Urdu Poetry World

laboN pe phuul khilte haiN kisi ke naam se pehle diloN ke diip jalte haiN chiraagh-e shaam se pehle kabhi manzar badalne par bhi qissa chal nahiiN paata kahaani khatam hoti hai kabhi anjaam se pehle yahi taare tumhaari aankh ki chilman meiN rehte the yahi suuraj nikalta tha tumhaare baam se pehle diloN ki jagmagaati bastiyoN pe raaj karte haiN yahi jo log lagte haiN nihaayat aam se pehle  hui hai shaam jungle meiN parinde lauTte hoNge  ab in ko kis tarah rokeN navah-e-daam se pehle  ya saare rang murda the tumhaari shakl ban_ne tak ya saare harf mohmal the tumhaare naam se pehle  hua hai voh agar munsif to Amjad ehtiyaatan ham  saza tasliim karte haiN kisi ilzaam se pehle

guzre haiN tire baad bhi kuChh log idhar se lekin tirri khushboo na gayi raahguzar se  kyuN duubti bhujti hui aankhoN meN hai raushan  raatoN ko shikaayat hai to itni hai sahar se  larza tha badan us ka mire haath se Chhuu kar dekha tha mujhe us ne ajab mast nazar se kya Thhaan ke nikla tha kahaaN aa ke paRa hai  puuChhe to koi is dil-e-sharminda safar se aaya hai bahut der meN voh shaKhs par us ko  jazbaat ki is bhiiR meN  dekhuuN maiN kidhar se  ham rizq-e-guzargaah to Khashaak the lekin voh log jo nikle the hava dekh ke ghar se aisa to nahiiN, meri tarah sarv-e-lab-e-juu qadamoN pe khaRaa ho kisi uftaad ke Dar se din the k hameN shahr-e-badan tak ki Khabar thi aur ab nahiiN aaghah tere khair Khabar se Amjad na qadam rok k voh duur ki manzil  nikle gi kisi roz isii gard-e-safar se

zindagi dard bhii, dava bhii thii hamsafar bhii guraizpaa bhii thii kuch to the dost bhii wafa dushman kuch mirri aankh meN haya bhii thii din ka apna bhii shor thaa laikin shab ki aavaaz be Sada bhii thii ishq ne ham ko Ghaibdaan kiyya yahi tuhfa , yahi saza bhii thii gardbaad-e-vafaa se pehle tak sar pe khaima bhii thaa rida bhii thii maaN ki aankheN charaGh thiiN jis meN mere hamraah vo dua bhii thii kuch to thii rehguzar meN shama-e-talab aur kuch tez vo hava bhii thii be vafa to vo khair thaa Amjad laikin us meN kahiiN vafa bhii thii

kehne ko mera us se koi vaasta nahiiN Amjad magar vo shakhS mujhe bhoolta nahiiN Darta huuN aaNkh kholuuN to manzar badal na jaaye maiN jaag to raha huuN magar jaagta nahiiN aashuftagi se us ki usse be wafa na jaan aadat ki baat aur hai dil ka bura nahiiN Saheb nazar se karta hai paththar bhii guftago na jins ke huzuur zubaaN kholta nahiiN tanha udaas chaand ko samjho na be khabar har baat sun raha hai magar bolta nahiiN khaamosh ratjagoN ka dhuwaaN thaa chahaar soo nikla kab aaftaab mujhe to pata nahiiN Amjad vo aankheN jheel si gehri to heN magar un meN koi bhii aks mirre naam ka nahiiN

kartaa huuN jamaa maiN to bikhartii hai zaat aur baaqii hai kitnii ai mirre maulaa yeh raat aur  leti hai jalti shamaa bhii bujhne meN kuChh to vaqt  hai aadmii saa koii kahaaN be-cabaat aur  sailaab jaise letaa hai diivaar ke qadam kartaa hai gham bhii dil se koii vaardaat aur yuuN to huzuur-e-pak(saw) k laakhoN heN madaKhwaaN  Taa’ib sii likh rahaa hai magar kaun na’at aur mazhar azl ke husn ke Amjad haiN be-shumaar lekin jo dekhiye to hai baarish kii baat aur

kaise kah duu.N ki mulaaqaat nahii.n hotii hai  roz milate hai.n magar baat nahii.n hotii hai  aap lillaah na dekhaa kare.n aaiinaa kabhii  dil kaa aa jaanaa ba.Dii baat nahii.n hotii hai chhup ke rotaa huu.N terii yaad me.n duniyaa bhar se  kab merii aa.Nkh se barasaat nahii.n hotii hai  haal-e-dil puuchhane vaale terii duniyaa me.n kabhii  din to hotaa hai magar raat nahii.n hotii hai  jab bhii milate hai.n to kahate hai.n kaise ho "Shakeel"  is se aage to koii baat nahii.n hotii hai 

jiine vaale qazaa se Darate hai.n  zahar piikar davaa se Darate hai.n [qazaa=death; zahar=poison] zaahido.n ko kisii kaa Khauf nahii.n  sirf kaalii ghaTaa se Darate hai.n [zaahid=knowledgeable/religious person; Khauf - fear] aah jo kuchh kahe hame.n ma.nzuur  nek ba.nde Khudaa se Darate hai.n [ma.nzuur=acceptable] dushmano.n ke sitam kaa Khuaf nahii.n  dosto.n kii vafaa se Darate hai.n [sitam=torment] azm-o-himmat ke baavajuud "Shakeel"  ishq kii ibtadaa se Darate hai.n [azm=decision; ibtadaa=beginning/start]

ha.ngaamaa-e-Gam se ta.ng aakar izhaar-e-musarrat kar baiThe  mashahuur thii apanii zi.ndaadilii daanistaa sharaarat kar baiThe  [izhaar-e-musarrat=show off happiness; daanistaa=knowlingly]  koshish to bahot kii hamane magar paayaa na Gam-e-hastii kaa mafar  viiraanii-e-dil jab had se ba.Dii ghabaraa ke mohabbat kar baiThe  [mafar=hiding place]  nazaro.n se na karate pursish-e-Gam Khaamosh hii rahanaa bahatar thaa  diivaano ko tumane chhe.D diyaa wallaah qayaamat kar baiThe  [pursish=inquire]  har chiiz nahii.n ek markaz par ek roz idhar ik roz udhar  nafrat se na dekho dushman ko shaayad ye mohabbat kar baiThe  [markaz=focal point] 

Gam-e-aashiqii se kah do raah-e-aam tak na pahu.Nche  mujhe Khauf hai ye tohamat mere naam tak na pahu.Nche  mai.n nazar se pee rahaa thaa to ye dil ne bad-duaa dii  teraa haath zindagii bhar kabhii jaam tak na pahu.Nche  naii subah par nazar hai magar aah ye bhii Dar hai  ye sahar bhii raftaa raftaa kahii.n shaam tak na pahu.Nche  vo navaa-e-muzamahil kyaa na ho jis me.n dil kii dha.Dakan  vo sadaa-e-ahale-dil kyaa jo avaam tak na pahu.Nche  u.nhe.n apane dil kii Khabare.n mere dil se mil rahii hai.n  mai.n jo unase ruuTh jaauu.N to payaam tak na pahu.Nche  ye adaa-e-beniaazii tujhe bevafaa mubaarak  magar aisii beruKhii kyaa ke salaam tak na pahu.Nche  jo naqaab-e-ruKh uThaa dii to ye qaid bhii lagaa dii  uThe har nigaah lekin koii baam tak na pahu.Nche  vahii ik Khamosh naGmaa hai "Shakeel" jaan-e-hastii  jo zubaa.N tak na aaye jo qalaam tak na pahu.Nche 

duur hai manzil raahe.n mushkil aalam hai tanahaa_ii kaa aaj mujhe ehasaas huaa hai apani shikastaapaa_ii kaa [shikastaah_paaii=infirmity of the feet] dekh ke mujh ko duniyaaa vaale kahane lage hai.n diivaanaa aaj vahaa.N hai ishq jahaa.N kuchh Khauf nahii.n rusavaa_ii kaa  chho.D de.n rasm-e-Khud_nigarii ko to.D de.n apanaa iimaa.N Khatm kiye detaa hai zaalim ruup terii a.nga.Daa_ii kaa Note: Peenaz Masani sinsg this as:  chho.D de rasm-e-Khud_nigarii ko chho.D de apanaa haath yahaa.N  Khaak kiye detaa hai zaalim ruup terii a.nga.Daa_ii kaa  mai.n ne ziyaa husn ko baKhshii us kaa to ko_ii zikr nahii.n lekin ghar ghar me.n charchaa hai aaj terii raanaa_ii kaa [ziyaaye.n=splendour, brilliance; raanaaii=radiance] ahal-e-havas ab ghabaraate hai.n Duub ke behar-e-Gam me.n "Shakeel"  pahale na thaa bechaaro.n ko a.ndaazaa geharaa_ii kaa [havas=desire; behar=sea, gulf, bay]

bas ik nigaah-e-karam hai kaafii agar u.nhe.n pesh-o-pas nahii.n hai  zaahe tamannaa kii merii fitarat asiir-e-hirs-o-havas nahii.n hai nazar se sayyaad duur ho jaa yahaa.N teraa mujh pe bas nahii.n hai  chaman ko barbaad karanevaale ye aashiyaa.N hai qafas nahii.n hai kisii ke jalve ta.Dap rahe hai.n huduud-e-hosh-o-Khirad ke aage  huduud-e-hosh-o-Khirad ke aage nigaah ke dastaras nahii.n hai jahaa.N kii nayarangiiyo.n se yaksar badal ga_ii aashiyaa.N kii suurat  qafas samajhatii hai.n jin ko nazare.n vo dar-haqiiqat qafas nahii.n hai kahaa.N ke naale kahaa.N kii aahe.n jamii hai.n un kii taraf nigaahe.n  kuchh is qadar mahv-e-yaad huu.N mai.n ki fursat-e-yak-nafas nahii.n hai tasavvur-e-ishrat-e-guzishtaa kaa husn-e-taasiir allaah allaah  vahii fazaaye.N vahii havaaye.N chaman se kuchh kam qafas nahii.n hai kisii ke be'etanaa_iyo.n ne badal hii Daalaa nizaam-e-gulashan  jo baat pahale bahaar me.n thii vo baat ab ke baras nahii.n h...

banaa banaa ke tamannaa miTaa_ii jaatii hai tarah tarah se vafaa aazamaa_ii jaatii hai jab un ko merii muhabbat kaa aitabaar nahii.n to jhukaa jhukaa ke nazar kyo.n milaa_ii jaatii hai hamaare dil kaa pataa vo hame.n nahii.n dete hamaarii chiiz hamii.n se chhupaa_ii jaatii hai 'Shakeel' duurii-e-manzil se naa-ummiid na ho manzil ab aa hii jaatii hai ab aa hii jaatii hai

ai mohabbat tere anjaam pe ronaa aayaa jaane kyo.n aaj tere naam pe ronaa aayaa yuu.N to har shaam ummiido.n me.n guzar jaatii thii aaj kuchh baat hai jo shaam pe ronaa aayaa kabhii taqdiir kaa maatam kabhii duniyaaa kaa gilaa manzil-e-ishq me.n har gaam pe ronaa aayaa  [gaam=step] jab huaa zikr zamaane me.n mohabbat kaa 'Shakeel' mujh ko apane dil-e-naakaam pe ronaa aayaa

apne ghar ki khiRki se maiN aasman ko dekhuN ga  jis par tera naam likha hai us taare ko dhuunDuN ga tum bhi har shab diya jala kar palkoN ki dehliiz pe rakhna maiN bhi roz ik khwaab tumhare shahr ki jaanib bhejuuN ga  hijr ke dariya meN tum paRhna lehroN ki tehriireN bhi paani ki har satar pe maiN kuChh dil ki baateN likhuuN ga jis tanha se peR ke niiche ham baarish meN bhiige the tum bhi us ko Chhuu ke guzarna maiN bhi us se liptuuN ga  Khwaab musafir lamhoN ke haiN saath kahaaN tak jaayeN ge tum ne bilkul Thhiik kaha hai , maiN bhi ab kuch sochuuN ga baadal oRh ke guzruN ga maiN tere ghar ke aangan se  qos-e-qaza ke sab rangoN meN tujh ko bhiiga dekhuuN ga raat gaye jab chaand sitaare lukan miiTi kheleN ge aadhi neeNd ka sapna ban kar maiN bhi tum ko Chhuu luuN ga  be mausam baarish ki suurat der talak or duur talak tere diyaar-e-husn pe maiN bhii kin min kin min barsuun ga sharm se dohra ho jaye ga kaan paRa voh bunda bhi  bad-...

mile kaise sadioN kii pyaas aur paani, zara phir se kehna baRi dilruba hai yeh saari kahani, zara phir se kehna kahaaN se chala tha judaai ka saaya, nahiiN dekh paaya k raste meN thii aansuoN ki ravaani, zara phir se kehna hava yeh Khabar tuu sunaati rahe aur maiN sunta rahuN badalne ko hai ab yeh mausam Khizaani, zara phir se kehna mukar jaane vaala kabhi zindagi meN khushi phir na paaye yuNhi Khatm ker leN chalo yeh kahaani, zara phir se kehna samay ke samandar! kaha tu ne jo bhi suna, par na samjhe javaani ki naddi meN tha tez paani, zara phir se kehna

ham the hamaare saath koi tiisra na tha aisaa hasiin din kahiiN dekha suna na tha aankhoN meN us ke tair rahe the haya ke rang palkeN uThha ke meri taraf dekhta na tha kuChh aise us ki jhiil si aankheN thiN har taraf ham ko sivaaye Duubne ke raasta na tha haathoN meN der tak koi Khushbu basi rahi darvaaza-e-chaman tha voh band-e-qaba na tha us ke to ang ang meN jalne lage diye jaadu hai mere haath meN, mujh ko pata na tha us ke badan ki lau se thi kamre meN raushni khiRki meN chaand, taaq meN koi diyaa na tha kal raat voh nigaar hua aisa multafat aksoN ke darmiyaan koi aaina na tha saansoN meN the gulaab to honToN pe chaandni inn manzaroN se maiN to kabhi aashna na tha royaa kuchh iss tarah mere shaane se lag ke voh aise laga ke jaise kabhi bevafa na tha hai ishq ek rog, muhabbat azaab hai ik roz yah kharaab kareN ge, kaha na tha! Amjad vahaaN pe had koii rehti bhi kis tarah rukne ko keh raha tha magar rokta na tha

koii mausam ho dil meiN hai tumhaari yaad ka mausam k badlaa hii nahiiN janaaN tumhaare baad ka mausam nahiiN to aazmaa kar dekh lo, kaise badaltaa hai tumhaare muskuraane se dil-e-naashaad ka mausam Sada taishe se jo nikli, dil-e-shiriiN se uThii thii Chaman Khusro ka thaa laikin, raha farhaad ka mausam ParindoN ki zubaaN badli, kahiN se DhuuND le tu bhii Nayyii tarz-e-fuGhaaN aye dil ke hai eejaad ka mausam ruttoN ka qaaeda hai waqt par yeh aati jaati heN hamaare shahr meN kyoN ruk gaya faryaad ka mausam kahiiN se us hasiiN aavaaz ki khushbuu pukaare gii to us ke saath badle gaa dil-e-barbaad ka mausam qafas ke baam-o-dar meiN raushani si aayii jaatii hai chaman meiN aa gaya shaayad lab-e-aazaad kaa mausam mere shahr-e-parishaaN meiN tirii be chaand raatoN meiN bahot hi yaad kartaa hooN tirii buniyaad ka mausam na koii gham khizaaN kaa hai, na Khwaahish hai bahaaroN kii hamaare saath hai Amjad kisii kii yaad ka mausam

kisii kii aaNkh jo purnam nahiiN hai na samajho yeh k us ko gham nahiiN hai savaad-e-dard meiN tanhaa khaRaa huuN  palaT jaauuN magar mausam nahiiN hai samajh meN kuchh nahiiN aataa kisii kii  agarche guftaguu mub_ham nahiiN hai sulagtaa kyuN nahiiN taariik jaNgal  talab kii lau agar maddham nahiiN hai ye bastii hai sitam parvar digaaN kii yahaaN koii kisii se kam nahiiN hai  kinaaraa duusra dariyaa ka jaise  vo saathii hai magar mahram nahiiN hai  diloN kii raushnii bujhne na denaa  vajuud-e-tiiragii muhkam nahiiN hai  maiN tum ko chaah kar paChhtaa rahaa huuN  koii is zaKhm kaa marham nahiiN hai  jo koii sun sake Amjad to dunyaa bajuz ik baaz gasht-e-gham nahiiN hai

***Khudaa jaane kahaa.N hai 'Asghar'-e-diivaanaa baraso.n se*** Khudaa jaane kahaa.N hai 'Asghar'-e-diivaanaa baraso.n se ki us ko Dhuu.NDhate hai.n ka'abaa-o-butaKhaanaa baraso.n se  ta.Dapanaa hai na jalanaa hai na jalakar Khaak honaa hai ye kyo.n so_ii hu_ii hai fitrat-e-paravaanaa baraso.n se  [fitrat=nature; paravaanaa=moth]  ko_ii aisaa nahii.n yaarab ki jo is dard ko samajhe nahii.n maaluum kyo.n Khaamosh hai diivaanaa baraso.n se  [yaarab=O God (it is used as an interjection)]  hasiino.n par na ra.ng aayaa na phuulo.n me.n bahaar aa_ii  nahii.n aayaa jo lab par naGmaa-e-mastaanaa baraso.n se  [lab=lip; naGmaa=song/melody; naGmaa-e-mastaanaa=happy song]  **ik aalam-e-hairat hai fanaa hai na baqaa hai**  ik aalam-e-hairat hai fanaa hai na baqaa hai  hairat bhii ye hai ki kyaa jaaniye kyaa hai  sau baar jalaa hai to ye sau baar banaa hai  ham soKhtaa jaano.n kaa nasheman bhii balaa hai  ...

***phirate hue kisii kii nazar dekhate rahe***  phirate hue kisii kii nazar dekhate rahe  dil Khuun ho rahaa thaa magar dekhate rahe  kuchh din ye bhii rang rahaa intazaar me.n  aa.Nkh uTh ga_ii jidhar bas udhar dekhate rahe  jab aashiyaa.N ki yaad asiirii me.n aa ga_ii  u.Date huye havaa me.n sharar dekhate rahe  [asiirii=prison; sharar=spark]  sunate raho ki dekh liyaa jalvaa behijaab  apanaa hii sab fareb-e-nazar dekhate rahe  [behijaab=uncovered; fareb=deception]  is vaaste ki aur ghaTe mol jins kaa  mataluub un ko dil thaa jigar dekhate rahe  [mataluub=longed for]  saamaan-e-sad_hazaar tamaashaa thii beKhudii  aa.Nkhe.n thii band aur 'Asar' dekhate rahe  ***dil kaa ronaa Thiik nahii.n hai muu.Nh ko kalejaa aane do*** dil kaa ronaa Thiik nahii.n hai muu.Nh ko kalejaa aane do thamate hii thamate ashk thame.nge naaseh ko samajhaane do kahate hii kahate haal kahe.nge...

Main akela hi chala tha jaanib-manzil, magar, Log saath aate gaye aur karwaan banta gaya.  Author : Majrooh Sultanpuri Wohi karwa’an, wohi raaste, wohi zindagi, wohi marhale … Magar apne apne maqam par kabhi tum nahi kabhi hum nahi Author : unknown Tu bhi aamaada-e-safar ho,Firaq Qaafile ustaraf lage jaane. Author : Firaq Gorakhpuri Bichar Kar Karwaan Se Men Aisa Hua Tanhaa ... Thaka Tanha Gira Tanha Utha Tanha Chala Tanha ...!! * Author : unknown Raftgaan ke jahaan mein hum bhi ham, Saath is karwaan ke hum bhi ham. Author : Mir Taqi Mir Qaafile mein subah ke ik shor hai, Yaani ghaafil hum chale, sota hai kya! Author : Mir Taqi Mir Sar zameen-e-Hind par aqwaam-e-aalam ke Firaq, Karwaan aate gaye, Hindustan banta gaya. Author : Firaq Gorakhpuri Safar karte hue manzil ba manzil ja rahe hain hum, Mujhe yeh saari duniya karwaan maaloom hoti hai. Author : Mehroom Hazaaron manzilen hon gi hazaron karwaan hon ge, Bahaarein hum ko dhoonde gi, na...

terii zad se nikalnaa chaahtaa hai yeh daryaa ruKh badalna chaahtaa hai voh sapnaa jiski suurat hii nahiiN hai mirii aankhoN meiN palnaa chaahtaa hai diloN ki maaNdgi hai kyaa ta'jjub k suuraj bhi to Dhalna chaahtaa hai nishast-e-dard badlii hai to ab dil zaraa pehluu badalnaa chaahtaa hai havaa hai baNd aur sholaa wafaa kaa bahot hii tez jalnaa chaahtaa hai yeh dil is gard baad-e-zindagii meiN bas ik lamhaa sambhalnaa chaahtaa ha i mujhe bhii saamnaa hai karbalaa kaa miraa sar bhi uChhalna chaahtaa hai nahiiN haiN tarjumaan-e-gham yeh aaNsuu yeh paanii ab ubalna chaahtaa hai guzashta sohbatoN ka ek lashkar mire hamraah chalnaa chaahtaa hai un aaNkhoN ki adaa kehti hai Amjad koi patthar pighalnaa chaahtaa hai

Khwaab-nagar hai aaNkheN khole dekh rahaa huuN us ko apnii jaanib aate dekh rahaa huuN kis kii aahaT qarya qarya phail rahii hai diivaaroN ke raNg badalte dekh rahaa huuN kaun mire jaaduu se bach kar jaa saktaa hai! aaiinaa huuN, sab ke chehre dekh rahaa huuN darvaaze par tez havaaoN kaa pehraa hai ghar ke andar chup ke saaye dekh rahaa huuN jaise meraa chehraa mire dushman kaa ho aaiine meiN Khud ko aise dekh rahaa huuN manzar manzar viiraanii ne jaal taane haiN gulshan gulshan bikhre patte dekh rahaa huuN manzil manzil haul meN Duubii aavaazeN haiN rastaa rastaa Khauf ke pahre dekh rahaa huuN shehr-e-saNg dilaN meiN Amjad har raste par aavaazoN ke patthar chalte dekh rahaa huuN

yahii bahut hai k dil us ko DhuuND laayaa hai kisii ke saath sahii, voh nazar to aayaa hai karuuN shikaayteN, taktaa rahuuN, k pyaar karuuN gayii bahaar kii suurat voh lauT aayaa hai voh saamne thaa magar, ye yaqiiN na aataa thaa voh aap hai k mirii KhvaahishoN ka saayaa hai azaab dhuup ke kaise haiN baarisheN kyaa haiN  fasiil-e-jism girii jab to hosh aayaa hai maiN kyaa karuuNgaa agar vo na mil sakaa 'Amjad'  abhii abhii mirre dil meiN Khayaal aayaa hai

jo utar k ziinaa-e-shaam se tirii chashm-e-Khush meiN samaa gaye vuhii jalte bujhte se mehr-o-maah mirre baam-o-dar ko sajaa gaye ye jo aashiqui ka hai silsila, hai ye aSl meiN koi maujza ke jo lafz mere gumaaN meiN the, vo tirri zubaaN pe aa gaye vho jo giit tum ne sunaa nahiiN mirii umr bhar kaa riyaaz thaa mirre dard kii thii vo daastaaN jise tum haNsii meiN uRaa gaye vo charaagh-e-jaaN kabhii jis kii lau na kisii havaa se niguuN huii tirii bevafaaii ke vasvase use chupke chupke bujhaa gaye voh thaa chaaNd shaam-e-visaal kaa k thaa ruup tere jamaal kaa merii ruuh se mirii aaNkh tak kisii raushnii meN nahaa gaye yeh jo bandagaan-e-niyaaz haiN yeh tamaam haiN vuhii lashkarii jinheN zindagii ne amaaN na dii to tirre huzuur meN aa gaye tirii beruKhii ke dayaar meN maiN havaa ke saath havaa huaa tirre aa’iine kii talaash meN mere Khvaab chehraa gaNvaa gaye tirre vasvasoN ke fishaar meiN, tiraa shahr-e-rang ujaR gayaa mirii KhvaahishoN ke ghubaar meN mirre maah-o-sa...

marne ka tire Gham meiN iradah bhi nahiiN hai hai ishq magar, itna ziyaadah bhi nahiiN hai hai yuuN k ibaadat ki zabaN aur hai ko’ii kaaGhaz mirii taqdeer ka saadah bhi nahiiN hai kyuN dekhte rehte haiN sitaroN ki taraf hum jab unse mulaqaat ka vaadah bhi nahiiN hai kyuN raah ke manzar meiN ulhaj jaati haiN aankheN jab dil meiN ko’ii aur iradah bhi nahiiN hai kyuN uski taraf dekh k paaoN nahiiN uThte wo shaKhS haseeN itna ziyaadah bhi nahiiN hai kis moR pe le aaya hameN hijr-e-musalsal taa had- e-nigaah vasl ka vaadah bhi nahiiN hai paththar ki tarah sard hai kyuN aaNkh kisii kii Amjad jo bichaRne ka iradah bhi nahiiN hai

chaaNd ke saath kaii dard puraane nikle kitne Gham the jo tire Gham ke bahaane nikle fasl-e gul aa'ii phir ik baar asiiraan-e-vafaa apne hii Khuun ke dariyaa meiN nahaane nikle hijr ki choT ajab saNg-shikan hotii hai dil kii befaiz zamiinoN se Khazaane nikle umr guzrii hai shab-e-taar meiN aaNkheN malte kis ufaq se miraa Khurshiid na jaane nikle kuu-e-qaatil meiN chale jaise shahiidoN kaa juluus  Khvaab yuuN bhiigtii aaNkhoN ko sajaane nikle  dil ne ik iiNT se ta’miir kiyaa taaj mahal  tuu ne ik baat kahii laakh fasaane nikle dasht-e tanhaaii-e-hijraaN meiN khaRa sochtaa huuN  haaye kyaa log miraa saath nibhaane nikle maiN ne 'Amjad' use bevaastaa dekhaa hii nahiiN  vo to Khushbuu meiN bhii aahaT ke bahaane nikle

ham the hamaare saath ko’ii tiisra na thaa aisaa hasiin din kahiiN dekhaa sunaa na thaa aankhoN meiN us kii tair rahe the hayaa ke raNg palkeN uThaa ke merii taraf dekhtaa na thaa kuchh aise us ki jhiil si aankheN thiN har taraf ham ko sivaaye Duubne ke raasta na thaa haathoN meiN der tak ko’ii khushbuu basii rahii darwaaza-e-chaman tha vo, baNd-e-qabaa na thaa us ke to aNg-aNg meiN jalne lage diye jaaduu hai mere haath meiN mujh ko pataa na thaa us ke badan ki lau se thii kamre meiN raushni khiRkii meiN chaand, taaq meiN ko’ii diyaa na thaa kal raat vo nigaar hua aisaa multafit aksoN ke darmiyaan ko’ii aaiina na thaa saaNsoN meiN the gulaab to hoToN pe chaandni in manzaroN se maiN to kabhi aashnaa na thaa royaa kuch is tarah mere shaane se lag ke vo aisaa laga ke jaise kabhii be wafaa na thaa hai ishq ek rog, mohabbat azaab hai ik roz ye kharaab kareN ge, kahaa na thaa! ~Amjad vahaaN pe had koi rehtii bhi kis tarah rukne ko keh raha thaa magar roktaa na...

**jiinaa azaab kyuu.N hai ye kyaa ho gayaa mujhe** jiinaa azaab kyuu.N hai ye kyaa ho gayaa mujhe kis shaKhs kii lagii hai bhalaa bad-duaa mujhe bananaa pa.Daa hai aap hii apanaa Khudaa mujhe  kis kufr kii milii hai bhalaa ye sazaa mujhe ye kah ke mai.n ne rakkhaa hai har aa_iine kaa dil  agale janam me.n ruup milegaa nayaa mujhe nikale the dono.n bhes badal kar to kyaa ajab mai.n Dhuu.NDhataa Khudaa ko phiraa aur Khudaa mujhe tuu mutama_iin nahi.n to mujhe kab hai aitaraaz  miTTii ko phir se goo.Ndh merii, phir banaa mujhe [mutama_iin=satisfied] **kabhii Khvaabo.n me.n milaa vo to Khayaalo.n me.n kabhii**  kabhii Khvaabo.n me.n milaa vo to Khayaalo.n me.n kabhii  raah chalate na milaa din ke ujaale me.n kabhii  zindagii hamase to is darjaa taGaaful na barat  ham bhii shaamil the tere chaahanevaalo.n me.n kabhii  jinakaa ham aaj talak paa na sake koii javaab  Khud ko Dhuu.Ndhaa kiye un TalKh savaalo.n me.n kabhii...

**a.nga.Daa_ii bhii vo lene na paaye uThaa ke haath**  a.nga.Daa_ii bhii vo lene na paaye uThaa ke haath  dekhaa mujhe to chho.D diye muskuraa ke haath besaaKhtaa nigaahe.n jo aapas me.n mil ga_ii.n  kyaa muu.Nh pe us ne rakh liye aa.Nkhe.n churaa ke haath [besaaKhtaa=suddenly] vo zaanuo.n pe siinaa chhupaanaa simaT ke haay  aur phir sambhaalanaa vo dupaTTaa chhu.Daa ke haath [zaanuo.n=thigh/lap] denaa vo us kaa saaGar-e-may yaad hai "Nizam"  muu.Nh pher ko udhar ko idhar ko ba.Dhaa ke haath **TuuTe huye dilo.n kii duaa mere saath hai**  TuuTe huye dilo.n kii duaa mere saath hai  duniyaa terii taraf hai Khudaa mere saath hai aavaaz ghu.Ngharuuo.n kii nahii.n hai to kyaa huaa  saaGar ke TuuTane kii sadaa mere saath hai tanhaa_ii kis ko kahate hai.n mujhako pataa nahii.n  kyaa jaane kis hasii.n kii duaa mere saath hai paimaanaa saamane hai to kuchh Gam nahii.n "Nizam"  ab dard-e-dil kii ko_ii davaa mere ...

diivaaro.n se mil kar ronaa achchhaa lagataa hai ham bhii paagal ho jaaye.nge aisaa lagataa hai  duniyaa bhar kii yaade.n ham se mil ne aatii hai.n shaam Dhale is suune ghar me.n melaa lagataa hai  kitane dino.n ke pyaase ho.nge yaaro socho to shabanam kaa qataraa bhii jin ko dariyaa lagataa hai  kis ko "Qaiser" patthar maruu.N kaun paraayaa hai  shiish mahal me.n ik ik cheharaa apanaa lagataa hai 

yahaa.N se ab kahii.n le chal Khayaal-e-yaar mujhe chaman me.n raas na aayegii ye bahaar mujhe terii latiif nigaaho.n kii Khaas jumbish ne  banaa diyaa terii fitarat kaa raazadaar mujhe merii hayaat kaa a.njaam aur kuchh hotaa  jo aap kahate kabhii apanaa jaa.N-nisaar mujhe badal diyaa hai nigaaho.n ne ruKh zamaane kaa kabhii rahaa hai zamaane pe iKhtiyaar mujhe ye haadasaat jo hai.n iztaraab kaa paiGaam  ye haadasaat hii aaye.nge saazagaar mujhe 'Aziz' ahal-e-chaman kii shikaayat besud fareb de ga_ii rangiinii-e-bahaar mujhe

kaash Khvaabo.n hii me.n aa jaao bahut tanahaa huu.N yaa mere zahan se yaado.n ke diye gul kar do  mere ehasaas kii duniyaa ko miTaa do ham-dam  raat taare nahii.n a.ngaare liye aatii hai  in barasate huye sholo.n ko bujhaa do ham-dam  dil kii dha.Dakan ko sulaa jaao bahut tanahaa huu.N a.Ndherii raat me.n jab chaa.Nd khilane lagataa hai  tumhaare pyaar ke diipak jalaake rotaa huu.N  tumhaare aane kii jab aas jaane lagatii hai  mai.n in chiraaGo.n ko Khud hii bujhaa ke rotaa huu.N  zindagii aisii miTaa jao bahut tanahaa huu.N sochate sochate jab soch bhii mar jaatii hai  vaqt ke qadamo.n kii aahaT ko sunaa karataa huu.N  ashk thamate hai.n to aaho.n kaa dhuaa.N uThataa hai  raat bhar yuu.N hii ta.Dapataa huu.N jalaa karataa huu.N  baar-e-Gam kuchh to ghaTaa jaao bahut tanahaa huu.N

tum se berangii-e-hastii kaa gilaa karanaa thaa  dil pe anbaar hai Khuu.Ngashtaa tamannaao.n kaa  aaj TuuTe hue taaro.n kaa Khayaal aayaa hai  ek melaa hai pareshaan sii ummiido.n kaa  chand paz_murdaa bahaaro.n kaa Khayaal aayaa hai  paa.Nv thak thak ke rah jaate hai.n maayuusii me.n  pur_mahan raah_guzaaro.n kaa Khayaal aayaa hai  saaqii-o-baadaa nahii.n jaam-o-lab-e-juu bhii nahii.n  tum se kahanaa thaa ki ab aa.Nkh me.n aa.Nsuu bhii nahii.n  [Khuu.Ngashtaa=dripping with blood; paz_murdaa=wilted]  [pur_mahan=full of sorrow; lab-e-juu=river side] 

dabii hu_ii hai mere labo.n me.n kahii.n pe vo aah bhii jo ab tak  na sholaa ban ke bha.Dak sakii hai na ashk-e-besuud ban ke nikalii  ghuTii hu_ii hai nafas kii had me.n jalaa diyaa jo jalaa sakii hai  na shamaa ban kar pighal sakii hai na aaj tak duud ban ke nikalii  diyaa hai beshak merii nazar ko vo paratau jo dard baKhshe  na mujh par Gaalib hii aa sakii hai na meraa masjuud ban ke nikalii  [ask-e-besuud =worthless tears; duud=smoke; paratau=image]  [Gaalib=victorious; masjuud=prayer] 

dayaar-e-Gair me.n ko_ii jahaa.n na apanaa ho  shadiid karb kii gha.Diyaa.N guzaar chukane par  kuchh ittefaaq ho aisaa ki ek shaam kahii.n  kisii ek aisii jagah se ho yuu.N hii meraa guzar  jahaa.N hujuum-e-gurezaa.N me.n tum nazar aa jaao  aur ek ek ko hairat se dekhataa rahe  [karb=sorrow; hujuum-e-gurezaa.N=running crowd] 

tumhaare lahaje me.n jo garmii-o-halaavat hai  ise bhalaa saa ko_ii naam do vafaa kii jagah  ganiim-e-nuur kaa hamalaa kaho a.Ndhero.n par  dayaar-e-dard me.n aamad kaho masiihaa kii  ravaa.N-davaa.N hue Khushbuu ke qaafile har suu  Khalaa-e-subah me.n guu.Njii sahar kii shahanaa_ii  ye ek koharaa saa ye dhu.Ndh sii jo chhaa_ii hai  is iltahaab me.n surmagii.n ujaale me.n  sivaa tumhaare mujhe kuchh nazar nahii.n aataa  hayaat naam hai yaado.n kaa talKh aur shiirii.n  bhalaa kisii ne kabhii rang-o-buu ko paka.Daa hai  shafaq ko qaid me.n rakhaa sabaa ko band kiyaa  har ek lamahaa gurezaa.N hai jaise dushman hai  na tum milogii na main ham bhii dono.n lamhe hai.n  vo lamhe.n jaake jo vaapas kabhii nahii.n aate  [halaavat=sweetness; ganiim=enemy; aamad=arrival] [ravaa.N-davaa.N=scattered/spread] [Khalaa-e-subah=morning silence]  [iltahaab=stupor; surmagiin=surmaa_ii = kohl lined] [talKh=b...

shaam hotii hai sahar hotii hai ye vaqt-e-ravaa.N  jo kabhii mere sar pe sang-garaa.N ban ke giraa  raah me.n aayaa kabhii merii himaalaa ban kar  jo kabhii ukdaa banaa aisaa ki hal hii na huaa  ashk ban kar merii aa.Nkho.n se kabhii Tapakaa hai  jo kabhii Khuun-e-jigar ban ke mizshGaa.N par aayaa  aaj bevaastaa yuu.N guzaraa chalaa jaataa hai  jaise mai.n kashmakash-e-ziist me.n shaamil hii nahii.n  [vaqt-e-ravaa.N=passing time; sang-garaa.N=heavy stone]  [himaalaa=Himalayas; ukdaa=problem; mizshGaa.N = eyelash]  [bevaastaa=without any relationship]