Ajnabii apne qadamo.n ko roko zaraa,

 Ajnabii apne qadamo.n ko roko zaraa,
jaantii huu.N tumhaare liye Ghair huu.N,
phir bhii Thahro zaraa,
sunte jaao ye ashko.n bharii daastaa.N,
saath lete chalo ye mujassim fuGhaa.N,
aaj duniyaa me.n meraa ko_ii bhii nahii.n,
merii ammii nahii.n,
mere abbaa nahii.n,
merii aapaa nahii.n,
mere nanhe se maasuum bhaiyaa nahii.n,
merii ismat kii maGhruur kirane.n nahii.n,
vo gharondaa nahii.n jis ke saaye tale,
loriyo.n ke tarannum ko sunatii rahii,
phuul chuntii rahii,
giit gaatii rahii,
msukuraatii rahii
aaj kuchh bhii nahii.n,

merii nazaro.n ke sahme hue aa_iine,
merii ammii ke mere abbaa ke aapaa ke, 
aur mere nanhe se maasuum bhaiyaa ke Khuun se,
hai.n dahashat_zadaa,
aaj merii nigaaho.n kii viiraaniyaa.N ,
chand majaruuh yaado.n se aabaad hai.n,
aaj merii umango.n ke suukhe ka.Nval ,
mere ashko.n ke paanii se shaadab hai.n,,
aaj merii tarhaptii hu_ii siskiyaa.N,
ek saaz-e-shikastaa kii fariyaad hai.n,
aur kuchh bhii nahii.n,
bhuuk miTatii nahii.n,
tan pe kaprhaa nahii.n,
aas maaduum hai,

aaj duniyaa me.n meraa ko_ii bhii nahii.n,
ajnabii apne qadamo.n ko roko zaraa,
sunte jaao ye ashko.n bharii daastaa.N,
saath lete chalo ye mujassim fuGhaa.N,

merii ammii bano,
mere abbaa bano,
merii aapaa bano,
mere nanhe se maasuum bhaiyaa bano,
merii ismat kii Maghruur kirane.n bano,
mere kuchh to bano ,
mere kuchh to bano ,
mere kuchh to bano .

Yu'n teri nigaho'n se gila kuchh bhi nahi tha,

Yu'n teri nigaho'n se gila kuchh bhi nahi tha,
is dil ne to bekaar yu'n hi baithe bithaye,
wiran-e-lamhat ko bahlane ki Khatir,
afsane garhe batai'n bana li thi hazaro'n,
ye ishq ka afsana jo phir chhera hai tu ne,
bekaar hai ab waqt kaha'n us ko suno mai,
jab tum ko faragat na thi ab mujh ko nahi hai.
  

Mukhlfeen ke ajab rabte the

          Mukhlfeen ke ajab rabte the
Ittfaq se hamare samne
Shumal mein junoob
Junoob mein shumal tha
Jo sir buland kohsar the shumal mein
Woh daikhte hi dakhte 
Junoob ke nashaib mein utar gayy
Nashaib ke makin jab
Khumar-e-bekran ki zad mein aa gaye
Ager cheh bal-o-per se ma wara the
Phir bhi aasman
Rafaton pe chha gayy
Ye jo aaj tak nashaibmein anja sakyy
Na rafaton peh chhasake
Muallaqat  ke hujoom mein kahin pe
Be shenakht ho gaye

tere lams-e-dast-e-hasii.n kii

tere lams-e-dast-e-hasii.n kii
dil aavez Khushbuu
terii u.ngaliyo.n se
merii u.ngaliyo.n me.n guzaratii hu_ii jab
hathelii me.n utarii to mai.n ne
ise dasht-e-tishanaa
me.n kuchh is tarah se sameTaa
ke mahafuuz kar luu.Ngaa shaayad abad tak
mai.n apane liye
sirf apane liye
teraa husn-e-shaGuftaa jamaal-e-daraKhshaa.N
gumaa.N se hasii.n Khvaab tak
mai.n ne mahafuuz tujh ko kiyaa
paao.n se sar talak ho gayaa mai.n munavvar


[lams = touch; dast = hands; dil aavez = pleasant/pelasurable]
[dasht = wilderness/desert; tishanaa = thirst; sameTaa = to gather]
[mahafuuz = protect/safe; abad = eternity; jamaal  = beauty]
[daraKhshaa.N = resplendent; shaGuftaa = ; gumaa.N = doubt/suspicion]
[munavvar = illuminated]

khoyaa khoyaa udaas saa hogaa

khoyaa khoyaa udaas saa hogaa
tum se vo shaKhs jab milaa hogaa

[shaKhs - person]

qurb kaa zikr jab chalaa hogaa
daarmiyaa.N ko_ii faasalaa hogaa

[qurb = nearness; daarmiyaa.N = in between]
[faasalaa = distance]

ruuh se ruuh ho chukii bad_zan
jism se jism kab judaa hogaa

[ruuh = soul; bad_zan = disillusioned]

phir bulaayaa hai us ne Khat likh kar
saamane ko_ii masa'laa hogaa

[masa'laa = problem]

ghar me.n sab log so rahe honge
phuul aa.Ngan me.n jal chukaa hogaa

kal kii baate.n karoge jab logo
Khauf saa dil me.n ruu_numaa hogaa

[Khauf = dread/fear; ruu_numaa = emerge/appear]