jaisaa huuN vaisaa kyuuN huuN samjhaa saktaa thaa maiN

jaisaa huuN vaisaa kyuuN huuN samjhaa saktaa thaa maiN
tumne puuchhaa to hotaa, batlaa saktaa thaa maiN

aasuudaa rahne kii Khwaahish maar gaii varnaa
aage aur bohat aage tak jaa saktaa thaa maiN

chhoTii moTii ek lahar hii thii mere andar
ek lahar se kyaa tuufaan uThaa saktaa thaa maiN

kahiiN kahiiN se kuchh misre, ek aadh Gazal, kuchh sher
is puunjii par kitnaa shor machaa saktaa thaa maiN

jaise sab likhte rahte haiN GazleN, nazmeN, geet
vaise likh likh kar ambaar lagaa saktaa thaa maiN

mere khudaa mujhe itnaa to motabar kar de

mere khudaa mujhe itnaa to motabar kar de
maiN jis makaan meN rahtaa huuN usko ghar kar de

yah roshnii ke taaqqub meN bhaagtaa huaa din
jo thak gayaa hai to ab usko muKhtasar kar de

maiN zindagii kii duaa maangne lagaa huuN bohat
jo ho sake to duaaoN ko be-asar kar de

sitaara-e-sahrii Duubne ko aayaa hai
zaraa koii mere suuraj ko baaKhabar kar de

qabiila-daar kamaaneN kaDakne vaalii haiN
mere lahuu kii gavaahii mujhe niDar kar de

merii zamiiN meraa aaKhrii havaala hai
so maiN rahuuN na rahuuN us ko baar-aavar kar de

Ye Ab Khula Hai K Koi Bhi Manzar Mera Na Tha

Ye Ab Khula Hai K Koi Bhi Manzar Mera Na Tha
Main Jis Mein Rah Raha Tha Wahi Ghar Mera Na Tha

Main Jis Ko Ek Umr Sambhale Phira Kiya
Mitti Bata Rahi Wo Paikar Mera Na Tha

Mauj-E-Hawa-E-Shahar-E-Muqaddar Jawab De
Dariya Mere Na The K Samandar Mera Na Tha

Phir Bhi To Sangsar Kiya Ja Raha Hun Main
Kahte Hain Nam Tak Sar-E-Mahzar Mera Na Tha

Sab Log Apne Apne Qabilon K Sath The
Ek Main Hi Tha K Koi Bhi Lashkar Mera Na Tha

Zara Si Der Ko Aaye The Khaawb Aankhon Mei

Zara Si Der Ko Aaye The Khaawb Aankhon Mei
Phir Us Ke Bad Musalsal Azaab Aankhon Mei

Wo Jis Ke Nam Ki Nisbat Se Raushani Tha Wujood
Khattak Rahaa Hai Wohi Aaftaab Aankhon Mei

Jinhen Mata-E-Dil-O-Jan Samajh Rahe The Ham
Wo Aa’iine Bhi Hue Behijaab Aankhon Mei

Ajab Tarah Ka Hai Mausam K Khak Urti Hai
Wo Din Bhi The K Khile The Gulaab Aankhon Mei

Mere Ghazaal Teri Wahshaton Ki Khair, K Hai
Bahut Dinon Se Bahut Iztaraab Aankhon Mei

Na Jane Kaisi Qayaamat Ka Peshkhema Hai
Ye Uljhanen Teri Be-Intasaab Aankhon Mei