aankh ki rah se bujhte hue lamhe utre
aqraba jitne the kashti ke wo sare utre
us se kahte ho ki phir lauTna hoga chhat par
sans ki lai ko jo thame hue zine utre
chha gai bachchon ke chehre pe nai hariyali
aaj phir peDon se aangan mein parinde utre
log sahil pe tamashai bane baiThe rahe
bich dariya mein faqat hum hi akele utre
chiKH nikli na koi aah-o-fughan ki main ne
yun to sine mein kai tir nukile utre
zulmat hī pahle thī jo havāle meñ rah gai
tasvīr-e-kā.enāt ujāle meñ rah gai
āñkhoñ kī hī sharāb thī tauba-shikan zarūr
kuchh aur bhī mai kī tarah pyāle meñ rah gai
kartī hai maut jaise ta.āqub hayāt kā
titlī girī fazā se to jaale meñ rah gai
bad-mazgī-e-sulūk kā gahrā asar huā
ik kañkarī sī mere nivāle meñ rah gai
sukhe hue daraKHt ke patton ko dekhna
phir chehra-e-hatyat ke zaKHmon ko dekhna
KHush-rangi-e-hayat ka paoge aks tum
patthar uchhaal kar zara lahron ko dekhna
meri nazar mein ye bhi ibaadat KHuda ki hai
shafqat bhari nigah se bachchon ko dekhna
is waste main pas hi rakhta hun aaina
mushkil hai apni aankh se jazbon ko dekhna
taKHrib-e-kaenat ki zinda misal hai
sahil pe intishaar ke zaKHmon ko dekhna
jakDenge ek din wahi rishton ke jal mein
ho jae dhund saf to apnon ko dekhna
zindagī ġhamgīn hotī jā rahī hai
aarzū rañgīn hotī jā rahī hai
chāñd taare āsmānoñ meñ Tañge haiñ
raat kī taz.īn hotī jā rahī hai
zulm phir parvān chaḌhtā jā rahā hai
zabt kī tauhīn hotī jā rahī hai
samt-e-mashriq dekhtā huuñ maiñ ujālā
raat kī takfīn hotī jā rahī hai
shādmāñ sā hai 'nizāmī' āj-kal vo
ruuh kī taskīn hotī jā rahī hai
shāḳh se phuul ko phir judā kar diyā
zaḳhm peḌoñ kā kis ne harā kar diyā
ek TukḌā ḳhushī kā thā rakkhā huā
jaane kis shaḳhs ne lāpata kar diyā
kyuuñ ta.alluq kī buniyād Dahne lagī
be-yaqīnī ko kis ne khaḌā kar diyā
pahle manzil dikhā.ī mujhe aur phir
band chāroñ taraf rāsta kar diyā
vaqt ḳhud apne chehre se Dar jā.egā
maiñ ne ehsās ko aa.ina kar diyā
kaun ḳhush-fahmiyāñ pāltā roz-o-shab
shukr hai zindagī ne rihā kar diyā
vaqt ne chaal kaisī chalī ai 'hasan'
dost jaise ko dushman-numā kar diyā
