* aik aur tanha shaam *

aik aur tanha shaam
koi aur shaam, koi aur waqt
wohi hai magar halat-e-zaar wohi hai...
wohi khamoshi ka andhera wohi yaas ki dhund
farq hai to bas itna !
kay meri tanhai se ghabra kay yeh shayad...
tumhi ho jo chali aayi ho
magar yeh zalim aql !
har ik lamha-e-faraib mein 
bata deti hai chupke se zaroor
kay jis aahat pay dil aik aur sa-at ji utha tha
woh khayale yaar hai....yaar nahin!

khamoshi

khamoshi na samjho...
yeh jo lab khamosh rehte hain
to dil ki ik ik dharkan aur
har saans rehti hai
goya
hazar daastane ghum ki
sad ehwale ishq ki 
yeh khamoshi hai ik pardah
sad hangame mehshar ka

In Labon Ki Muskurahat...

In labon ki muskurahat rahate dil
bekhudi mein bosae shab hasrate dil !
Kaj adaen aur jafaen wahshate jaan
Naam tera tha nishane turbate dil
Tum na yoon rootha karo ab baat be baat
Seh sakoon ga kab talak yeh shamate dil
Aik hi sa-at ko dildharka nahin tha
Intihae Jaan woh ek hi sa-ate dil
Dil dikhao cheer kar apna, kaha to
Khud hi phir dekhi gai na haalate dil
Waqt bhi jab hijr mein tham sa gaya tha
Ho thami shayad jabhi yeh harkate dil
Ab malamat nafs ki bhi dheemay dheemay
Kay gawara kar sakay jo sehhate dil
Gham kisi ka bhi dikha ro ro utha yeh
Ho chuki kuch aisi hi bas adate dil
Is judai se bara kya hai sitam aur ?
Khamushi se seh isay bhi, himmate dil !
Jaan sitam kya kya na sehti seh chali thi
Gharq gham kya kya hue na wahshate dil !
Husn tera tha kabhhi to noore dil bhi
Phir bana tera sitam hi zulmate dil
Dil Owys-e ghamzada ka jab thame to
Raqm ho shayad tabhi yeh baabate dil..

EID KI KHUSHYAAN !

Kaise manaooN eid ki khushyaaN bata ae jaan-e-man?

Aisa nahiN ke jo bahakti marmareeN hathoN meiN hoN
BateN khanakti na Karen who chooRiaN shokhi bhari
Uljhaey na naqsh-e hina, behkaey na teri mehak
Na ho adaa dikash teri, na ho nazar masti bhari
ChaRhney magar manzar na dey tera nasha ae jaan-e-man!
Kaise manaooN eid ki khushyaaN bata ae jaan-e-man?

GhamgeeN haiN kitnay khandaaN, ujRay haiN kitnay hi diyaar
Apnay watan meiN be watan, apne hi ghar meiN be amaaN
Laasha uThaey apna hi kitnay phiray haiN sogwaar
Kya kya qiyamat jhel kar kitnay miTa baiThay nishaaN
Kis baat ki in ko mili hai yaaN saza ae jaan-e-man?
Kaise manaooN eid ki khushyaaN bata ae jaan-e-man?

Mehnat kashoN ka ab lahoo bhi na ragoN meiN kuch bacha
Iflaas ki chakki pise mazdoor sab, dehqaan sab
Ghurbat meiN jo bhookay mareN hasrat ke le aankhoN meiN khwaab
Chehray koi in ke bhi haiN, zi jaan sab, insaan sab
Ummeed-e farda naam per kya kya saha ae jaan-e-man!
Kaise manaooN eid ki khushyaaN bata ae jaan-e-man?

Yeh sab waDeray, choudry, sardar aur ik ik malik
Hathoun meiN jinke mulk ka arsay se hai saara nizam
Jin ke bharay aali mehal sab looT ke bas maal se
Jatthay gidhoun ke! Noch ke jo kha gaey nash-e awaam
Yeh kab talak ban kar phireN jhooTay khuda ae jaan-e-man?
Kaise manaooN eid ki khushyaaN bata ae jaan-e-man?

Ayyaam se phir haar kar bikti kaheeN dukhtar koi
Halaat se majboor ho karti koi hai khud kushi
Zinda dafan, zindaaN dakhal, kaari, wani is ka naseeb
Had se agar bach jaey to mar mar jeay ik be basi
Kyun jurm hai itna wujood-e-zan baRa ae jaan-e-man?
Kaise manaooN eid ki khushyaaN bata ae jaan-e-man?

Aabaa the apne ghairat-e islaam se sarshaar ke
Woh Ibn-e- Qaasim paar karta aa chala sehra tamaam
Ham par magar na Aafia ki aah ka kuch bhi asar
Aghyaar ke haathoN biki ghairat bhi apni kya tamaam?
Aai kisi ko bhi nahiN us ki sada ae jaan-e-man?
Kaise manaooN eid ki khushyaaN bata ae jaan-e-man?

Jis deen ka maqsad jihaalat se kabhi aazadi tha
Islaam ke is naam par kya kya dukaaN hai khul gai
Ab lafz ki taqdees gum aur kho chukka hurmat qalam
Har dars se mafqood ab ilm-o shaur-o aagahi
Muslim juhad par Daal kar mujh ko jagaa ae jaan-e-man!
Kaise manaooN eid ki khushyaaN bata ae jaan-e-man?

Jab ehtisaab-e qoum ka Dar na kisi zaalim ko ho
Zulm-o jabar sehne ki aadat ho gai jab aam ho
Jab inqilaab-e haq ki ik bhi na ramaq baaqi rahe
Ho murdni chaai hui aur zindagi neelam ho
Is raakh meiN DhoonDoN sharar kaise bhala ae jaan-e-man?
Kaise manaooN eid ki khushyaaN bata ae jaan-e-man?

Ik aur dhamaaka to kaheeN phir kya hua ae jaan-e-man?
Meri samaat sun hui! too ne suna ae jaan-e-man?
Dekha kisi ne ke lahoo kitna bahaa ae jaan-e-man?
Ghar kya bacha, kya too bachi, kya meiN bacha ae jaan-e-man?
Ya maar kar ab khud hi ko meiN mar gaya ae jaan-e-man?
Kaise manaooN eid ki khushyaaN bata ae jaan-e-man?

Yaqeen

Gar tumheiN is par yaqeeN to phir chale aao yahaaN !
kuch baeed-e qais ki ab bhi puhaNch se hai nahiN
jooay sheer ik khod Daale kohkan ab bhi yahiN
na mile mumkin-o-na mumkin ki sarhad phir kahiN
raqm ho ik lazawaal-o-aafreeN phir daastaN !
Gar tumheiN is par yaqeeN to phir chale aao yahaaN !
kya hai aisa jo muhabbat na sake kar ke dikha
dastaras meiN hai sabhi, iski koi na intiha
jo na manTaq kar sake hal, na khirad paaey samaa
lamha-e waahid laga jaaey yeh jast-e bekaraaN
Gar tumheiN is par yaqeeN to phir chale aao yahaaN !
gar muqaabil ishq to phir tadbeer hai kis kaam ki
na jise Dar mout ka, kya fikr isay anjaam ki
phir zamane ki houN taazeereiN ke gard aalaam ki
zulmat-e zindaaN ho ya jabr-o-sitam ki bayRiyaaN !
Gar tumheiN is par yaqeeN to phir chale aao yahaaN !
ho muhabbat ka shajar jouN jouN tawaana aur jawaaN
ishq jab hai douRta ban ban phiray rooh-e rawaaN
kyuN nichaawar ishq par aise na phir ho jism-o-jaan
ishq par hai na zamaaN ki, na isay qaid-e makaaN !
Gar tumheiN is par yaqeeN to phir chale aao yahaaN !
aao phir mein aur tum toofan har jaaeeN guzaar
paar kar jaaeN har ik hi behr-e naar-o dasht-e khaar
raiza raiza har rukaawaT, saath gar hai mera yaar
haiN amar jab ishq hai ! chaahe kaThin ho imtihaaN
Gar tumheiN is par yaqeeN to phir chale aao yahaaN !
*******

Nasha

JahaaN ki dard se ho chali bojhal fiza aur
Har ik is aatish-e-gham ko manzar dey hawa aur

Raha janaaN madawa kabhi har gham ka tu hi
Magar ik chaahiye ab nasha tujh se baRa aur