ishq kii maar ba.Dii dardiilii ishq me.n jii na pha.Nsaanaa jii

ishq kii maar ba.Dii dardiilii ishq me.n jii na pha.Nsaanaa jii
sab kuchh karanaa ishq na karanaa ishq se jaan bachaanaa jii

vaqt na dekhe umar na dekhe jab chaahe majabuur kare
maut aur ishq ke aage to ko_ii chale na bahaanaa jii

ishq kii Thokar maut kii hichakii dono.n kaa hai ek asar
ek kare ghar ghar rusvaa_ii ek kare afsaanaa jii

ishq kii nemat phir bhii yaaro har nemat par bhaarii hai
ishq kii Tiise.n den Khudaa kii ishq se kyaa ghabaraanaa jii

ishq kii nazaro.n me.n yaksaa.N kaabaa kyaa but_Khaanaa kyaa
ishq me.n duniyaa uqbaa kyaa hai kyaa apanaa begaanaa jii

raah kaThin hai pii ke nagar kii aag pe chal ke jaanaa hai
ishq hai sii.Dhii pii ke milan kii jo chaaho to nibhaanaa jii

'Tarz' bahut din jhel chuke tum duniyaa kii zanjiiro.n ko
to.D ke pinjaraa ab to tumhe.n hai des piyaa ke jaanaa jii

ik zara dil ke qariib aao to kuchh chain pa.De

ik zara dil ke qariib aao to kuchh chain pa.De
jaam ko jaam se Takaraao to kuchh chain pa.De

baiThe baiThe to har mauj se dil dahalegaa
ba.Dake tuufaan se Takaraao to kuchh chain pa.De

jii ulajhataa hai naGmaa-e-rangiin sun kar
giit ek dard bharaa gaao to kuchh chain pa.De

daaG ke sher javaanii me.n bhale lagate hai.n
miir kii ko_ii Gazal gaao to kuchh chain pa.De

yaad-e-ayaa.N me.n guzishtaa.N se ijaazat lekar
'Tarz' kuchh der ko so jaao to kuchh chain pa.De

duniyaa banii to hamd-o-sunaa ban ga_ii Gazal

duniyaa banii to hamd-o-sunaa ban ga_ii Gazal
utaraa jo nuur nuur-e-Khudaa ban ga_ii Gazal

guu.Njaa jo naad_brahm banii raqs-e-mahar-o-maah
zarre jo thar-tharaaye sadaa ban ga_ii Gazal

chamakii kahii.n jo barq to ehasaas ban ga_ii
chhaa_ii kahii.n ghaTaa to adaa ban ga_ii Gazal

aa.Ndhii chalii to qahar ke saa.Nche me.n Dhal ga_ii
baad-e-sabaa chalii to nashaa ban ga_ii Gazal

haivaan bane to bhuuk banii bebasii banii
insaan bane to jazb-e-vafaa ban ga_ii Gazal

uThaa jo dard-e-ishq to ashko.n me.n Dhal ga_ii
bechainiyaa.N ba.Dii to duaa ban ga_ii Gazal

zaahid ne pii to jaam-e-panaah ban ke rah ga_ii
rindo.n ne pii to jaam-e-baqaa ban ga_ii Gazal

arz-e-dakkan me.n jaan to dilli me.n dil banii
aur shahar lakhanau me.n hinaa ban ga_ii Gazal

dohe rubaa_ii nazme.n sabii 'Tarz' the magar
asnaaf-e-shaayarii kaa Khudaa ban ga_ii Gazal

beniyaaz-e-sahar ho ga_ii

beniyaaz-e-sahar ho ga_ii
sham-e-Gam moatabar ho ga_ii

ik nazar kyaa idhar ho ga_ii
ajanabii har nazar ho ga_ii

zindagii kyaa hai aur maut kyaa
shab hu_ii aur sahar ho ga_ii

unkii aa.Nkho.n me.n ashk aa gaye
daastaa.N muKhtasar ho ga_ii

chaar tinake hii rakh paaye the
bijaliyo.n ko Khabar ho ga_ii

chhi.D ga_ii kis kii daaman kii baat
Khud_ba_Khud aa.Nkh tar ho ga_ii

un kii mahafil se uThakar chale
raushanii ham_safar ho ga_ii

'Tarz' jab se chhuuTaa kaaravaa.N
ziist gard-e-safar ho ga_ii