tum apne gird hisaaroN kaa silsilaa rakhnaa

tum apne gird hisaaroN kaa silsilaa rakhnaa
 magar hamaare liye ko’ii raastaa rakhnaa

(gird : around; hisaar : fence, fort)

hazaar saanihe pardes meN guzarte haiN
 jo ho sake to zaraa hamse raabitaa rakhnaa

(saanihaa : accidents, raabitaa : contact)

KhizaaN rakhegii daraKhtoN ko be-samar kab tak
 guzar hii jaayegii ye rut bhii hauslaa rakhnaa

(KhizaaN : autumn; be-samar : fruitless)

ziyaadaa der “Zafar” zulm rah nahiiN saktaa
 agar ab aayeN kaRe din to jii kaRaa rakhnaa

lamha-lamha hai baare-garaaN, bachaa lo mujhko

lamha-lamha hai baare-garaaN, bachaa lo mujhko
 bekaraaN waqt ke malbe se nikaalo mujhko

Khushk patta hii sahii, rauNd ke aage na baRho
 maiN gaii rut kii nishaani hooN uThaalo mujhko

Khud_pasaNdi kii KhalaaoN meN phirooN aavaara
 is bulaNdi pe to yaaro na uchhaalo mujhko

maiN rafaaqat kii ghaTa ban ke baras jaaooN
 apnii tanhaaii ke saHraa meN bulaa lo mujhko

bhaagatii bhiiRh ne jaane kise paamaal kiyaa
 chiiKh kar ko_ii pukaara thaa, bachaa lo mujhko

shab-e-taariiq ka pur_haul safar hai ''Sabir''
 shamm-e-maNzil hooN, sar-e-raah jalaa lo mujhko

tumhari raah ki dewaar to hona nahi hum ko

tumhari raah ki dewaar to hona nahi hum ko
 agar hum boojh ban jae'n, to dhona nahi hum ko

hamari khush naseebi ha, tumhari aan par marna
 agar hum mar gaye to dekhna rona nahi hum ko

dubara jo ugao gay ,dubara fasal de'n gay hum
 magar pathar diloo'n ke shehar me'n bona nahi hum ko

kisi ki yaad se mahkay hai’n, iss dil ke baam o dar
suno ay neend sun lo tum, nahi sona nahi hamko

zafar hum zindagi hain, zindagi ik baar milti hai
 agar mil jae'n hum tum ko, phr khona nahi hum ko