Aage bade na qissaa-e-ishq-e-butaa'n se ham

Aage bade na qissaa-e-ishq-e-butaa'n se ham
sab kuchh kahaa magar na khule raazadaa’n se ham


ab bhaagate hai’n saayaa-e-ishq-e-butaa’n se ham
kuchh dil se hain dare hue kuchh aasmaa’n se ham


hanste hai’n uske giriiyaa-e-beikhtiyaar par
bhoole hai’n baat kahake koi raazadaa’n se ham


ab shauq se bigaad kii baate’n kiyaa karo 
kuchh paa gaye hai’n aap kii tarz-e-bayaa’n se ham


jannat me’n tuu nahii’n agar ye zakhm-e-tegh-e-ishq 
badale’nge tujhako zindagii-e-jaavidaa’n se ham

Haq vafaa kaa jo ham jataane lage

Haq vafaa kaa jo ham jataane lage 
aap kuchh kahke muskuraane lage 

ham ko jiinaa padegaa furqat me 
vo agar himmat aazamaane lage 

Dar hai merii zubaan na khul jaaye 
ab vo baate’n bahut banaane lage 

jaan bachatii nazar nahii'n aatii 
Ghair ulfat bahut jataane lage 

tum ko karanaa padegaa uzr-e-jafaa 
ham agar dard-e-dil sunaane lage 

bahut mushkil hai shevaa-e-tasliim 
ham bhii aakhir ko jii churaane lage 

vaqt-e-rukhsat thaa sakht "Hali" par 
ham bhii baiThe the jab vo jaane lage 

Tum aa’nkho’n se duur ho huii niind aa’nkho’n se duur,

Tum aa’nkho’n se duur ho huii niind aa’nkho’n se duur,
mere saathii Gham kii choT se huaa dil kaa shiishaa chuur, 


mujhe shikavaa hai taqadiir se nahii’n tum se koii Gilaa,
mujhe laakar yuu’n pardes me’n meraa sab kuchh chhiin liyaa,
merii aa’nkho’n me’n aa’nsuu aa base huu’n rone par majabuur,
mere zaKhm hue pardesiyaa aa ris ris ke naasuur, 


mujhe rogii karke pyaar kaa diyaa Gham kaa rog lagaa,
mere jalte hue charaagh ko merii qismat gaii bujhaa,
mujhe dhokaa diyaa nasiib ne nahii’n meraa koii kusuur,
mujhe dhokaa diyaa nasiib ne nahii’n meraa koii kusuur. 

Kahne kii baat ho to use kah sunaayiye ,

Kahne kii baat ho to use kah sunaayiye ,
jo dil pe ban rahii ho, kyo’n kar dikhaayiye,

duniyaa kii ho havas to dil-o-dii’n ga’nvaayiye ,
yaa’n khoyiye bahut-saa to kuchh jaa ke paayiye,

ye kyaa ki dil hai dair me’n aur ka’abe me’n maqaam, 
ho rahiye bas vahii’n ke, jahaa’n dil lagaayiye,

gar jaan kaa zarar hai mohabbat me’n naaseho, 
ham jaan hii se baiThe hai’n bezaar jaayiye,

aur aitabaar khote hii apanaa rahaa-sahaa ,
bas aa gayaa yaqii’n hame’n, qasame’n na khaayiye,

hotii hujuum-e-Gham me’n hai, kyo’n zahar kii talaash, 
’Hali’ bataaye’n aap ko, gar kuchh khilaayiye.

Hai justajuu ke Khuub se hai Khuubtar kahaa.N

Hai justajuu ke Khuub se hai Khuubtar kahaa.N 
ab dekhiye Thaharatii hai jaa kar nazar kahaa.N

yaarab is iKhtilaat ka anjaam ho baaKhair 
tha us ko ham se rabt, magar is qadar kahaa.N

ik umr chaahiiye ke gavaaraa ho naish-e-ishq 
rakkhii hai aaj lazzat-e-zakhm-e-jigar kahaa’n,

ham jis pe mar rahe hai’n vo hai baat hii kuchh aur ,
aalam me’n tujhse laakh sahii tuu magar kahaa’n,

hotii nahii’n qubuul duaa tark-e-ishq kii, 
dil chaahataa na ho to zubaa’n me’n asar kahaa’n,

’Hali’ nishaat naghmaa-o-mai Dhuu’nDhate ho ab ,
aaye ho waqt-e-subah, rahe raat bhar kahaa’n.

Hangaamaa hai kyuu’n barpaa tho’Dii sii jo pii lii hai,

Hangaamaa hai kyuu’n barpaa tho’Dii sii jo pii lii hai,
Daakaa to nahii’n Daalaa chorii to nahii’n kii hai, 

naa-tajurbaakaarii se vaaiz kii ye baate’n hai’n,
is rang ko kyaa jaane puuchho to kabhii pii hai, 

us mai se nahii’n matalab dil jis se hai begaanaa,
maqasuud hai us mai se dil hii me’n jo khi’nchtii hai, 

vaa’n dil me’n ki sadme do yaa’n jii me’n ke sab sah lo,
un kaa bhii ajab dil hai meraa bhii ajab jii hai,

har zarraa chamaktaa hai anavaar-e-ilaahii se,
har saa’ns ye kahtii hai ham hai’n to Khudaa bhii hai,

suuraj me’n lage dhabbaa fitrat ke karishme hai’n,
but ham ko kahe kaafir allaah kii marzii hai. 

Dil se khayaal-e-dost bhulaayaa na jaayega

Dil se khayaal-e-dost bhulaayaa na jaayega
siine meiN daaG hai, miTaayaa na jaayega


tumko hazaar sharm sahii, mujhko laakh zabt
ulfat vo raaz hai jo chhupaayaa na jaayegaa


maqsuud apnaa kuchh na khulaa lekin is qadar
yaanii voh DhuunDhte haiN ki paaya na jaayega


bigDeN na baat baat pe kyuuN jaante haiN voh
hum voh nahiiN ki hamko manaayaa na jaayegaa