Un pe guzri koi Saa'at to AzaaboN ki tarah

Un pe guzri koi Saa'at to AzaaboN ki tarah
jo samandar nazar aatey haiN, SaraaboN ki tarah

Qais o farhaad k qissey they hamari meeraass 
unko padhtey rahey ham log NisaaboN ki tarah

Zulmate-shab mein mahak uTh-ti hain yaadeiN aksar
Teri zulfoN ke saman aur GulaaboN ki tarah

Zindagii kaise guzaari koi ham se poochey
Soyi aankhoN ki tarah, jaagtey KhwaboN ki tarah

Ab nayi nasl ke bachchey nahi padhtey inko
hain Buzurg aaj ke, farsooda KitaboN ki tarah

uski masnad hai hami khaak-nasheenoN ki ata'a
ham se milta hai jo ab aali-janaboN ki tarah

har zamane mein 'Sukhan' surkh-ru ham log huye
har taghayyur pe nazar rakhkhi uqaaboN ki tarah

Aaj phir mere tasavvur ka hai mehvar chandni

Aaj phir mere tasavvur ka hai mehvar chandni
Jaa- ba-Ja chitki hui wo khwab-paikar chandni

Wo salona roop lekar baam par aaye agar
dekhti hai shokhiyoN se usko ruk kar chandni

Ru-siyaahi ban gayi hai har 'amaavas' ka naseeb
Hai magar poonam ki raatoN ka muqaddar chandni

AahatoN se ho gaye bedaar phir kitne kahyal
Raat ke zeene se aayi hai utar kar chandni

Ek ridaaye-noor bankar chaa gayi hai farsh par
ban gayi hai khetkhalyaano ka bistar chandni

Shabnami poshaak pehne aakhirash rukhsat hui
chand qatrey mere chehre par gira kar chandni

Eik manzar hai Milan ka zehn meiN ab tak 'sukhan' 
Raat ka pichla pehar, taarey, samander, chandni

'Zeir' se 'pesh' ho gaya hai Tuu

'Zeir' se 'pesh' ho gaya hai Tuu
Door andesh ho gaya hai Tuu

Pehle ghaafil nahi tha Tu mujh se
Ab, kam o beish ho gaya hai Tuu

Jaan ko apni khud jalata hai
Qehr-e-Darvesh ho gaya hai Tuu

Koi apna hi ab nahi lagta
Is qadar khweish ho gaya hai Tuu

Raah mei har qadam ta'ammul hai
Wo pas-o-pesh ho gaya hai Tuu

Munakis ho rahey haiN sab tujh meiN
Aayina-kesh ho gaya hai Tuu

Gul-mizaaji teri kahaN hai 'Sukhan'
aajkal nesh ho gaya hai Tuu