ye soch kar ki terii jabii.n par na bal pa.De

ye soch kar ki terii jabii.n par na bal pa.De
bas duur hii se dekh liyaa aur chal pa.De

[jabii.n = forehead; bal - wrinkle]

dil me.n phir ik kasak-sii uThii muddato.n  ke baad
ik umr ke ruke hue aa.Nsuu nikal pa.De

siine me.n beqaraar hai.n murdaa muhabbate.n
mumkin hai ye charaaG kabhii Khud hii jal pa.De

[mumkin = possible] 

ai dil tujhe badalatii hu_ii rut se kyaa milaa
paudho.n me.n phuul aur daraKhto.n me.n phal pa.De

[daraKht = tree]

ab kis ke intazaar me.n jaage.n tamaam shab
vo saath ho to niind me.n kaise Khalal pa.De

[tamaam = whole/entire; shab = night; Khalal = disturbance]

'Shehzad' dil ko zabt kaa yaaraa nahii.n rahaa
nikalaa jo maahataab samandar uchhal pa.De

[zabt = tolerance/restraint; yaaraa = strength; maahataab = moon]

vo diyaa jis se mere qalb-o-nazar raushan the

vo diyaa jis se mere qalb-o-nazar raushan the 
mai.n ne jab haath lagaaya to jale haath mere

[qalb-o-nazar=heart and eye]

ghar kii taKhtii ko_ii pa.Dhataa hii nahii.n kyaa kiije 
ko_ii ho jo ki mujhe shahar me.n rusavaa kar de

[rusavaa=disgrace]

mujhe ye dukh ki ye lazzat terii qismat me.n nahii.n 
aur tuu Khush ki kisii saa.Np ne kaaTaa na tujhe

terii qismat terii haatho.n kii lakiiro.n me.n nahii.n 
Dhuu.NDh kar laa vo sitaaraa ki jabii.n par chamake

[jabii.n=forehead]

dekhane kuchh na diyaa dasht ke aage kyaa hai 
ban gaye raah kii diivaar musaafir kitane

[dasht=wilderness]

vaadii-e-marg hai ye shahar jo din ko Khush thaa 
aap shab-Khuu.N kii tamannaa me.n kahaa.N aa pahu.Nche

[vaadii-e-marg=valley of the dead; shab-Khuu.N=bloody evening]

mere haatho.n se rukaa sail-e-havaa kaa relaa 
sang huu.N yaa ki mai.n aahan huu.N mujhe sochane de

[sail-e-havaa=fast wind; sang=stone; aahan=iron]

tay ho.nge kis tarah ye maraahil kahaa na jaa_e

tay ho.nge kis tarah ye maraahil kahaa na jaa_e
is tiiragii me.n kyaa hai muqaabil kahaa na jaa_e

[maraahil=obstacles; tiiragii=darkness; muqaabil=in front]

Khud de diye hai.n mai.n ne use haath kaaT kar
vo likh diyaa hai jo sar-e-mahafil kahaa na jaa_e

[sar-e-mahafil=in a gathering]

patthar hue vo lafz ke the jiite jaagate 
is Khaamashii se kyaa huaa haasil kahaa na jaa_e

[Khaamashii=silence; haasil=gain]

ab tak to chal rahe.n hai.n tere saath saath ham 
aaye.ngii kis jagah had-e-faasil kahaa na jaa_e

[had-e-faasil=boundary that separates]

nashaa hai yaa ke zahar fizaa me.n milaa huaa 
kuchh hai har ek chiiz me.n shaamil kahaa na jaa_e

[fizaa=environment/air; shaamil=included]

aaKhir kahii.n to baiTh gaye paa.Nv to.D kar 
phir kyaa kahe.nge agar ise manzil kahaa na jaa_e

ye aur baat kuchh bhii dikhaa_ii na de sake 
aa.Nkhe.n khulii hu_ii ho.n to Gaafil kahaa na jaa_e

[Gaafil=unaware]

sitaaraa apanii bhii taabindagii na dekh sakaa

sitaaraa apanii bhii taabindagii na dekh sakaa
vo dhundh thii ki ye manzar ko_ii na dekh sakaa

[taabindagii = brilliance/shine]

talaash karate huye u.Ngaliyaa.N jalaa Daalii.n
vo tiiragii thii ki mai.n shama bhii na dekh sakaa

[tiiragii = darkness]

milaa thaa shaam mujhe ik bujhaa huaa suuraj
mai.n us ke baad phir raushanii na dekh sakaa

jo rabt baaqii the sab qataa kar liye us ne
vo meharabaa.N merii bechaaragii na dekh sakaa

[rabt = relations; qataa = break]

nigaah viase to baam-e-falak ko chhuu aa_ii
mai.n jis zamii.n pe kha.Daa thaa vahii na dekh sakaa

[baam-e-falak =roof of the sky (zenith)]

vahii hai aa_iinaaKhaanaa vahii hai.n tasviire.n
mai.n umr bhar ko_ii suurat na_ii na dekh sakaa

[aa_iinaaKhaanaa = glass house]

tamaam shahar me.n vo diidaavar huaa mashahuur
vo apanii naak se aage kabhii na dekh sakaa

[tamaam = entire; diidaavar = connoisseur/one who has a discerning eye]

samajh me.n ye nahii.n aataa ki dil kii Khuu kyaa thii

samajh me.n ye nahii.n aataa ki dil kii Khuu kyaa thii
safar to aaTh pahar kaa thaa justajuu kyaa thii

[Khuu = habit; justajuu = search]

vo aabashaar ke paanii sii tab'a rakhataa thaa
magar thake huye lahaje kii guftaguu kyaa thii

[aabashaar = waterfall; tab'a = nature]
[lahajaa = style/manner; guftaguu = conversation]

hu_ii shikast jahaa.N fateh kaa yaqiin huaa
ko_ii chhupaa huaa dushman thaa aarazuu kyaa thii

[shikast = defeat; fateh = victory; yaqiin = belief]

talaash karate ho kis shay ko is Kharaabe me.n
daraKht hii na rahe shaaKh-e-rang-o-buu kyaa thii

[Kharaabe = broken down/wretched palce; daraKht = tree]
[shaaKh-e-rang-o-buu = colour and fragrance of branches]

tuu aaftaab agar thaa to kyo.n Guruub huaa
ye raushanii see tere baad chaar-suu kyaa thii

[aaftaab = Sun; Guruub = setting of the sun/disappear]
[chaar-suu = all around]

daraKht puKhtaa chhate.n to.D kar nikal aaye
ye ik azaab hii thaa quuvat-e-namuu kyaa thii

[puKhtaa = strong; chhat = roof; azaab = torment/misfortune]
[quuvat-e-namuu = strength/energy to grow]

mumkin ho aap se to bhulaa diijiye mujhe

mumkin ho aap se to bhulaa diijiye mujhe 
patthar pe huu.N lakiir miTaa diijiye mujhe 

har roz mujh se taazaah shikaayat hai aap ko 
mai.n kyaa huu.N ek baar bataa diijiye mujhe 

mere sivaa bhii hai koii mauzuu-e guftuguu 
apanaa bhii koii rang dikhaa diijiye mujhe 

mai.n kyaa huu.N kis jagah huu.N mujhe kuchh Khabar nahii.n 
hai.n aap kitanii duur sadaa diijiye mujhe 

kii mai.n ne apane zaKhm kii tashahiir jaa-ba-jaa 
mai.n maanataa huu.N jurm sazaa diijiye mujhe 

qaayam to ho sake koii rishtaa gauhar ke saath 
gehare samu.ndaro.n me.n bahaa diijiye mujhe 

shab bhar kiran kiran ko tarasane se faayadaa 
hai tiiragii to aag lagaa diijiye mujhe 

jalate dino.n me.n Khud pas-e-diivaar baiThakar 
saaye kii justujuu me.n lagaa diijiye mujhe 

"Shehzad" yuu.N to sholaa-e jaa.N sard ho chukaa 
lekin sulag uThuu.N to havaa diijiye mujhe 

lauT aa_ii tere lams se mahakii hu_ii shaame.n

lauT aa_ii tere lams se mahakii hu_ii shaame.n
phir aag lagaa dii terii saa.Nso.n ne havaa 

[lams = touch]

raqsaa.N hai.n isii lay pe sitaare.n ho.n ki shabanam
kyaa sahar hai is dil ke dha.Dakane kii sadaa me.n

[raqsaa.N = dancing; lay = tune/rhythm]

ik nuur kaa sailaab hai band aa.Nkho.n ke andar
lipaTe hue chehare hai.n andhere kii ridaa me.n

[nuur = light; sailaab = flood; ridaa = sheet]

kis aag ne rakkhaa hai qadam dil kii zamii.n pe
suuraj se damakate hai.n nishaan-e-kaf-e-paa me.n

[kaf-e-paa = sole of the foot]

is Khauf se ik umr hame.n niind naa aa_ii
ik chor chhupaa baiThaa hai siine kii gufaa me.n

[Khauf = dread; gufaa = cave]

jaag uTThaa hai dil me.n ko_ii soyaa huaa vahashii
ham ghar me.n hai.n 'Shehzad' ki jangal kii fazaa me.n

[vahashii = crazed (person)]

jo shajar suukh gayaa hai vo haraa kaise ho

jo shajar suukh gayaa hai vo haraa kaise ho 
mai.n payamabar to nahii.n meraa kahaa kaise ho 

dil ke har zarre pe hai naqsh muhabbat usakii 
nuur aa.Nkho.n kaa hai aa.Nkho.n se judaa kaise ho 

jis ko jaanaa hii nahii.n usako Khudaa kyuu.N maane 
aur jise jaan chuke hai.n, vo Khudaa kaise ho 

umr saarii to a.Ndhere me.n nahii.n kaT sakatii 
ham agar dil na jalaaye.n to zi_aa kaise ho 

jisase do roz bhii khul kar na mulaaqaat huii 
muddato.n baad mile bhii to gilaa kaise ho 

kin nigaaho.n se use dekh rahaa huu.N "Shehzad" 
mujh ko maaluum nahii.n, us ko pataa kaise ho 

jal bhii chuke paravaane ho bhii chukii rusvaa_ii

jal bhii chuke paravaane ho bhii chukii rusvaa_ii 
ab Khaak u.Daane ko baiThe hai.n tamaashaa_ii

taaro.n kii ziyaa dil me.n ik aag lagaatii hai 
aaraam se raato.n ko sote nahii.n saudaa_ii

[ziyaa=light/brilliance]

raato.n kii udaasii me.n Khaamosh hai dil meraa 
behis hai.n tamannaaye.n nii.nd aa_ii ki maut aa_ii

[behis=in a stupor]

ab dil ko kisii karavaT aaraam nahii.n milataa 
ik umr kaa ronaa hai do din kii shanaasaa_ii

ik shaam vo aaye the ik raat farozaa.N thii 
vo shaam nahii.n lauTii vo raat nahii.n aa_ii

[farozaa.N=lit-up]

haal usakaa tere chehare pe likhaa lagataa hai

haal usakaa tere chehare pe likhaa lagataa hai 
vo chup chaap kha.Daa hai teraa kyaa lagataa hai 

yuu.N to har chiiz salaamat hai merii duniyaa me.n 
ek ta'alluq hai jo TuuTaa huaa lagataa hai 

mai.n ne sochaa thaa ke aabaad huu.N ek shahar me.n mai.n 
yaa.N to har shaKhs kaa a.ndaaz judaa lagataa hai 

moddate.n biit gaii.n tay na huii ma.nzil-e-shauq 
ek aalaam mere raste me.n pa.Daa lagataa hai 

ai mere jazbaa-e-dauro.n mujh me.n kashish hai itanii 
jo khaataa hotaa hai vo tiir bhii aa lagataa hai 

jaane kaun sii pastii me.n giraa huu.N "Shehzad" 
suuraj bhii is qadar duur hai ke diyaa lagataa hai 

Duub jaaye.nge sitaare aur bikhar jaayegii raat

Duub jaaye.nge sitaare aur bikhar jaayegii raat 
dekhatii rah jaaye.ngii aa.Nkh.en guzar jaayegii raat

raat kaa pahalaa pahar hai ahal-e-dil Khaamosh hai 
subah tak rotii hu_ii aa.Nkho.n se bhar jaayegii raat

aarazuu kii behisii kaa gar yahii aalam rahaa 
betalab aayegaa din aur beKhabar jaayegii raat

shaam hii se so gaye hai.n log aa.Nkhe.n muu.Nd kar 
kis kaa daravaazaa khulegaa kis ke ghar jaayegii raat

apanii tasviir ko aa.Nkho.n se lagataa kyaa hai

apanii tasviir ko aa.Nkho.n se lagataa kyaa hai 
ik nazar merii taraf dekh, teraa jaataa kyaa hai 

merii rusavaa_ii me.n tuu bhii hai baraabar kaa shariik 
mere qisse mere yaaro.n ko sunaataa kyaa hai 
[rusavaa_ii=notoriety; shariik=to be a part of] 

paas rahakar bhii na pahachaan sakaa tuu mujhako 
duur se dekh kar ab haath hilaataa kyaa hai 

safar-e-shauq me.n kyo.n kaa.Npate hai.n paa.Nv tere 
duur se dekh kar ab haath uThaataa kyaa hai 

umr bhar apane girebaa.N se ulajhane vaale 
tuu mujhe mere saaye se Daraataa kyaa hai 

[girebaa.N=technically means the collar of a shirt but generally refers to a person's clothing/body] 

mar gaye pyaas ke maare to uThaa abr-e-karam 
bujh ga_ii bazm to ab shama jalaataa kyaa hai 

mai.n teraa kuchh bhii nahii.n huu.N, magar itanaa to bataa 
dekh kar mujhako tere zehan me.n aataa kyaa hai 
[zehan=mind] 

ab na vo shor na vo shor machaane vaale

ab na vo shor na vo shor machaane vaale 

Khaak se baiTh gaye Khaak u.Daane vaale

ye alag baat mayassar lab-e-goyaa na huaa 

dil me.n vo dhuum ki sunate hai.n zamaane vaale

dil saa vahashii kabhii qaabuu me.n na aayaa yaaro.m 

haar kar baiTh gaye jaal bichhaane vaale

terii qurbat me.n guzaare huye kuchh lamhe hai.n 

dil ko tanahaa_ii kaa ehasaas dilaane vaale

ab tak us kii muhabbat kaa nashaa taarii hai

ab tak us kii muhabbat kaa nashaa taarii hai
phuul baaqii nahii.n Khushbuu kaa safar jaarii hai

sahar lagataa hai pasiine me.n nahaayaa huaa jism
ye ajab Khvaab me.n Duubii hu_ii bedaarii hai

[bedaarii = wakefulness]

aaj kaa phuul terii kokh se zaahir hogaa
shaaKh-e-dil Khushk ha no ab ke terii baarii hai

dhyaan bhii us kaa hai milate bhii nahii.n hai.n us se
jism se bair hai saaye se vafaadaarii hai

[bair = enmity]

dil ko tanhaa_ii kaa ahasaas bhii baaqii na rahaa
vo bhii dhundhalaa ga_ii jo shakl bahut pyaarii hai

is tag-o-taaz me.n TuuTe hai.n sitaare kitane
aasmaa.N jiit sakaa hai na zamii.n haarii hai

[tag-o-taaz = running around busily/work]

ko_ii aayaa hai zaraa aa.Nkh to kholo 'Shehzad'
abhii jaage the abhii sone kii taiyaarii hai

[taiyaarii = preparation]