Gosha Nashee'n hai'n, anjuman aara nahii hai'n ham

Gosha Nashee'n hai'n, anjuman aara nahii hai'n ham
lekin yeh mo'ajzah hai ke, tanha nahii hai'n ham

jab se mili hai daulate arfano aagahii
duniya mei'n rah ke shamil duniya nahii hai'n ham

mushkil nahii hai dosto'n taskheer kainaat
afsos bas isi ka hai yakjaa nahii hai'n ham

farda ka khawb waqt kii aawaz nahii hai'n ham
ek yaadgaare ahad guzishta nahii hai'n ham

hasil hai ham ko liz'zate tauba khata ke baad
behtar hai aadmi hai'n farishta nahii hai'n ham

shaadab hai hamee se tera gulshane wajood
dariya hai'n jaane aarzoo, sahra nahii hai'n ham

'Tariq Mateen' yo'n mili tauqeer khak mei'n
ho kar bhii is jahan mei'n goya nahii hai'n ham

Phool saare teri khush rang nazar ke liye haiN

Phool saare teri khush rang nazar ke liye haiN
Zakhm jitne bhi hain sab mere jigar ke liye haiN

Jane kis kaam ke hain, kya hai  hamaara masraf??
Hum kisi ghar ke liye hain na safar ke liye haiN

Kitne aalaam O masaayeb ke hain mahvar hum log
KashtiyaN jo bhi hain apni woh bhaNvar ke liye haiN

Meri tanhaayi ke monis hain! mere gham ke rafeeq!
Saare aaNsoo, jo mere deeda e tar ke liye haiN

Apni taqdeer meiN kuchh bhi nahi patjhaR ke siwa
Yeh bahaarein to faqat aek shajar ke liye haiN

Mujh se kahne lagii yeh raat, K Tariq saheb
Aap jaage hue kis khaab e sehar ke liye hain?

Qaar E gumnaami se nikle to khabar meN aaye

Qaar E gumnaami se nikle to khabar meN aaye
Teergi kaaT ke hum chaaNd nagar meN aaye


Dil meN is tarh utarte haiN tamanna k parind
Jaise khushhaali achanak kisi ghar meN aaye


Kaash aisa ho K aabaad rahe sab ka makaaN
Roushni aaye to har sehn me dar meN aaye


NaQsh E paa se tere mil jaaye suraaGh E manzil
Tu jo guzre to chamak raah guzar meN aaye


Din ke hangaame teri yaad se Ghafil rak_kheN
Shaam hote hi tera dard jigar meN aaye


Hum salaamat rahe yeh uski nawazish hi to hai
Tuti patwaar liye beech bhaNwar meN aaye

Yeh taQaazaa to zaruri nahi Tariq Sahab
Aap ka naam bhi arbaab E hunar meN aaye

Mila hai kaise nashe ka suraaGh ab ke baras

Mila hai kaise nashe ka suraaGh ab ke baras
Bhare gaye haiN lahoo se ayaaGh ab ke baras


Azaab utraa hai kaisa K gulshan E dil meN
Shajar shajar hai khazaaN deeda zaaGh ab ke baras

Hamari aaNkhoN meN utra hai jugnuoN ka juloos
Kisi ne di hai woh souGhat E daaGh ab ke baras

Woh jis ke naQsh E qadam se bahaar thi mansoob
Milaa na uska kahiN bhi suraaGh ab ke baras


Sanak uThi haiN kuchh is tarh aaNdhiyaaN Tariq
K bujh rahe haiN khushi ke charaaGh ab ke baras

MaiN kisi kuu E aziyyat se nahi aaya hooN

MaiN kisi kuu E aziyyat se nahi aaya hooN
NarGha E sang E malaamat se nahi aaya hooN


Apni pahchaan banaayi hai to aaya hooN yahaaN
MaiN kisi baab E riyaayat se nahi aaya hooN


Apni aaNkhoN meN chupaale K tera aks hooN maiN
Kisi aayinaa E zulmat se nahi aaya hooN


MaiN bhi ek khaak ka putlaa huN tere hi jaisa
Kisi dozakh, kisi jannat se nahi aaya hooN


Teri shiriN sukhani khiiNch ke laayi hai mujhe
Yaar maiN apni zaroorat se nahi aaya hooN


Itni begaangi achhi nahi  Tariq saahab
MaiN kisi shahr E adaavat se nahi aaya hooN