KHud qalam ban ke, TooT kar likkhi
aik hi nazm umr bhar likkhi
us ne qismat meN kab sahar likkhi
likh bhi di gar, to muKHtasar likkhi
likkhi taqdeer meri be aeraab
aur nuqte bhi chhoR kar likkhi
mere qirtaas-e-umr par us ne
har kaThin rah safar safar likkhi
kya vo maaneN ge daastaaN teri?
doosre ruKH se maiN ne gar likkhi?
dekhna to kiran ne sooraj ki
behte paani pe kya KHabar likkhi
musHaf-s-shab pe aik din Yawar
paRh hi looN ga kaheeN sahar likkhi
