nahii.n ki milane milaane kaa sil_silaa rakhanaa

nahii.n ki milane milaane kaa sil_silaa rakhanaa 
kisii bhii satah pe ko_ii to raabtaa rakhanaa 

[satah=level; raabtaa=relationship] 

madad kii tum se tavaqqo to Khair kyaa hogii 
Gariib-e-shahar-e-sitam huu.N meraa pataa rakhanaa 

[madad=help; tavaqqo=expectation] 

mare.nge aur hamaare sivaa bhii tum pe bahut 
ye jurm hai to phir is jurm kii sazaa rakhanaa 

naye safar pe ravaanaa huaa hai az-sar-e-nau 
jab aa_uu.Ngaa to meraa naam bhii nayaa rakhanaa 

[az-sar-e-nau=a fresh start] 

hisaar-e-shauq uThaanaa 'Zafar' zaruur magar 
kisii taraf se nikalane kaa raastaa rakhanaa 

[hisaar-e-shauq=bonds of desire] 

Zafar Iqbal