اے دل ! نواۓ بیم و رجا، سُن نہ لے کوئی

اے دل !  نواۓ بیم و رجا، سُن نہ لے کوئی
یہ   داستانِ   ہوش   رُبا ،  سُن نہ لے کوئی


وہ  خوش جمال  مرکزِ ہر چشم و گوش ہے 
پاۓ نگہ ! سنبھل کے ذرا، سُن نہ لے کوئی
           
تزئینِ  زلفِ  یار   ہیں  گُل  ہاۓ  خندہ  زن 
آہستہ   زلفِ   یار   ہٹا ،   سُن نہ لے کوئی 

بادِ صبا  ہے  ڈھونڈھے چمن در چمن اسے  
چپکے سے حالِ  زار سنا ، سُن نہ لے کوئی

ٹوٹا  پڑا  ہے شیشۂ دل  مے کدے کے بیچ
ساقی سنبھل کے پاؤں اُٹھا ، سُن نہ لےکوئی

بیشک خدا سے مانگ پر آہستگی سےمانگ
راز و نیازِ  حرفِ   دُعا ،  سُن نہ لے کوئی

دم  سادھے  بزمِ  یار  میں  بیٹھے  رہو ندیم  
موجِ نفس میں دل کی صدا، سُن نہ لے کوئی

احمد ندیم رفیع