MiT gayaa jab miTne vaalaa phir salaam aayaa to kyaa ,

MiT gayaa jab miTne vaalaa phir salaam aayaa to kyaa ,
dil kii barbaadii ke baad un kaa payaam aayaa to kyaa,

chhuT ga_ii.n nabze.n ummide.n dene vaalii hai.n javaab ,
ab udhar se naamaabar leke payaam aayaa to kyaa,
[naamaabar=messenger]

aaj hii miTnaa thaa ai dil hasrat-e-diidaar me.n ,
tuu merii naakaamiyo.n ke baad kaam aayaa to kyaa,
[hasarat-e-diidaar=desire to see]

kaash apnii zindagii me.n ham ye ma.nzar dekhte ,
ab sar-e-turbat ko_ii mahshar-Khiraam aayaa to kyaa,
[turbat=tomb; mahshar=day of judgement; Khiraam=walk]

saa.Ns ukharhii aas TuuTii chhaa gayaa jab rang-e-yaas ,
naamaabar laayaa to kyaa Khat mere naam aayaa to kyaa,

mil gayaa vo Khaak me.n jis dil me.n thaa armaan-e-diid ,
ab ko_ii Khurshiid-vash baalaa-e-baam aayaa to kyaa.
[Khurshiid-vash=sun-like face]