Aatish-e-ishq ka shikaar huye

Aatish-e-ishq ka shikaar huye
 Ham pe kuch raaz aash'kaar huye

Kon chaahe nikaalna in ko
 Teer jo dil ke aar paar huye

Wo bhi ghabra rahe the milne se
 Be'hawas ham bhi baar baar huye

Aik ham hii se parda kya karna
 Taalib-e-deed to hazaar huye

JholiyaN kis tarha bhare koi
 Jab ke daaman hii taar taar huye

Wo jo kal tuhmateiN lagaate the
 Aaj ruswaa sar-e-bazaar huye

Mere aansoo ka ye asar hai Shahab
 Rait ke shehar laalaa'zaar huye