yah dunyaa ek KhawaaboN kii zamiiN hai

yah dunyaa ek KhawaaboN kii zamiiN hai
yahaaN sab kuchh hai aur kuchh bhii nahiiN hai

tere chhuune se pahle vaahma thaa
mujhe ab apne hone ka yaqiiN hai

jo socho to sulag uThti haiN saaNseN
teraa ehsaas kitnaa aatishiiN hai

mohaajir ban gaye haiN mere aaNsuu
na aaNchal hai na koii aastiiN hai

jagah duuN kaise tujhko apne dil meN
yahaaN to teraa Gam masnad-nashiiN hai

mere chehre pe koii jhuk rahaa hai
yah lamhaa to Khudaa jaisaa hasiiN hai