Gham-e-dauran ne bhi seekhe gham-e-janan ke chalan

Gham-e-dauran ne bhi seekhe gham-e-janan ke chalan
 wohi sochi hui chaalen wohi besaakhtaapan

wohi iqraar men inkaar ke laakhon pahloo
 wohi hothon pe tabassum wohi abroo pe shikan

kis ko dekha hai keh pindar-e-nazar ke baawasf
 ek lamhe ke liye ruk gai dil kii dharakan

kaun si fasl men is baar mile hain tujh se
 ham ko parvah-e-gireban hai na fikr-e-daaman

ab to chubhti hai hawa barf ke maidaanon ki
 un dinon jism ke ehasaas se jalata tha badan

aisii sooni to kabhi shaam-e-gharibaan bhi na thi
 dil bujhe jaate hain ai teeragi-e-subah-e-watan